5日嘅關西行程,先去兩日大阪,再去3日京都。除左去左大阪一D必去景點外,今次仲去左2016年新開日本最高摩天輪,嗰度將會成為熱門嘅景點!!另外都去左京都一D必去嘅熱門景點。

目的地:大阪、京都
出遊日期:7月10日 – 7月14日

 

Day 1

三井花園飯店大阪淀屋橋

落機到達關西空港後,就搭南海電鐵去難波,再轉御堂筋線3個站到淀屋橋站去酒店check in。呢間酒店我比好評,好推薦!位置於淀屋橋站付近,距離心齋橋2個站,由淀屋橋站12號出口行去酒店,只需要8-10分鐘,沿途平直路。

我地book左兩間房,一間雙人床,一間兩張單人床雙人房。兩張單人床雙人房呢間係有兩個浴室!!(浴缸+洗手盤+廁所)非常方便!

另外酒店嘅正樓下就已經有7仔,酒店行返出大街即係車站出口,亦都有間幾大嘅超市。

最好嘅係,係超市買完野食,超市裹面有個位置間咗出黎,係可以係埋裹面食野!而且每當夜晚就關舖時會有好多嘢食半價,啱晒晚夜行完街買宵夜食!不過要留意佢每日關舖時間都唔一樣,個門口會有個牌睇到,我去個陣一日關20點,一日關22點。每日朝早都去嗰度買早餐,係嗰度食埋就出發。

心齋橋筋商店街

去完酒店check in後,搭2個站就黎到大阪必去地標心齋橋行街食晚飯,第一晚去左道頓堀食燒肉。

食完行左一段心齋橋,去到10點好多店都開始閉門,就返酒店。

 

Day 2

黑門市場

每日係酒店附近超市食完早餐後出發。第二日先去咗位於日本橋站附近嘅黑門市場。就算唔買唔食,睇下都好熱鬧嫁~

心齋橋筋商店街

去完黑門市場,再行返去第一日未行完嘅心齋橋。

 

千日前通

行完心齋橋,再去埋難波行千日前通。千日前通其實都係同心齋橋個D商店街差唔多。行完呢度時間大約5點幾,搭車去下個景點。

EXPOCITY

第2日最尾一站。好值得去嘅地方!我地坐左日本最高摩天輪!搭去千里中央站轉一架單軌車!!萬博記念公園站一出就見到!

LaLaport EXPOCITY係位於萬博記念公園站,地方會比較遠小小,但好值得去!由難波去呢度,大約45分鐘,轉一程車,如果覺得搭45分鐘都唔算遠的話,真係要黎一黎啊!

EXPOCITY係日本最大購物中心,鐘意shopping就一定要黎囉,加上2016年7月1日啱啱開左呢個全日本最高+世界第五高「REDHORSE OSAKA WHEEL」摩天輪!!摩天輪高度為123m,地板全為透明玻璃嘅「穿透式」構造。價錢方面1位當日票1,000日圓(含稅)

呢度絕對可以花一日時間黎!!有大商場,又有餐廳,仲有摩天輪。以下地方我無行到去,其實呢度有埋水族館,仲有類似兒童天地,而睇圖都見到有個比卡超專門店。另外,離開商場,就係付近有個萬博記念公園,睇圖都可以見到有個叫太陽之塔係個度,如果櫻花,紅葉時節去呢個公園應該會仲正!行完商場,坐完摩天輪,食埋晚餐,就返酒店,完結第2日行程~

 

Day 3

新大阪站

第3日會由大阪去京都。Check out後,早餐後,會先去新大阪站。由新大阪站轉乘JR京都線新快速(另有分普通車,快速車,而新快速是最快,價錢是一樣的),就直達京都站。順帶一提,新大阪站內有買手信嘅店,書店等等,未夠鐘上車都可以買下野,周圍睇睇。

京都二条城高級城市酒店

坐到去京都站後,轉JR嵯峨野線(山陰線)去二条站,即我今次京都住嘅酒店:京都二条城高級城市酒店,呢間我都好like,都會推薦!!

 

清水寺

由京都站對出嘅巴士站就有巴士去到清水寺。清水道落車後沿住水牌行,沿路都會有商店街,就會到清水寺。

京都站大樓

去完清水寺,搭返巴士返京都站,京都站附近都有好多野行,我地就行左Yodobashi,家品電器賣衫嘅都有,幾好行嫁,大部分舖頭都有免稅。喺京都站仲可以睇到夜晚嘅京都塔。之後我地就返返酒店附近食晚餐,就結束呢日行程。

Day 4

嵐山公園

第4日食完早餐,就出發到第一站,嵐山。

搭JR嵯峨野線到嵯峨嵐山站。無記錯的話,JR站格離就係嵐山小火車站,大部分人去嵐山都會坐埋小火車,但我去個日係星期三,正正就係小火車休息日,所以如果打算坐埋個小火車的話就記得唔好星期三去啦。由嵯峨嵐山行去渡月河,竹林有一段距離,跟住人,指示牌行就會到。除左嵐山竹林,渡月橋呢啲影相位,沿途都有手信店,地道特式小店,小食店。

伏見稻荷大社

去完嵐山, 下一站係伏見稻荷大社。

係京都站轉車搭JR奈良線,稻荷站一出站就見到大鳥居入口。

伏見稻荷大社係最受外國人歡迎的日本旅遊景點嘅第一位,黎京都一定要黎呢度啦!

千本鳥居係呢度嘅賣點,有歷史又有文化。沿途都一樣有信商店等。點都要黎觀摩下呢!

河原町

下一站來到河原町。由京阪本線嘅伏見稻荷站唔洗轉車幾個站到祇園四条落車。河原町係京都最熱鬧嘅市中心,有大型購物商場,又有商店街,係京都嘅購物景點。

呢度交通好方便,除左地下鐵,大街兩旁都有巴士站,好多巴士亦會經過呢一區。所以我地行到黃昏又攰就直接坐巴士直達酒店附近食晚餐。

由於個度巴士路線都幾多,如果有打算搭巴士去呢度或由呢度搭巴士去其他地方,可以事先check定搭幾號,或到時再用google map 搜尋都得

Day 5

錦市場

到最後一日啦~由於晚上8點左右先飛,食完早餐後,再次搭巴士到上一日未行晒嘅河原町,因為由我地酒店來回河原町搭巴士真係好方便,所以再搭去都唔會好晒時間。

呢日去咗河原町嘅錦市場。錦市場被稱為「京都的廚房」,各式各樣嘅美食都應有盡有,呢度大部分嘅店營業時間為中午12到下午5點陸續收攤。

而京都河原町一帶每年7月中至尾都會舉辦祇園祭,祇園祭係日本京都每年一度舉行嘅節慶。如果係個段時間去會睇到大型巡遊。而我地去嘅時候係前夕,雖然睇唔到巡遊,但周圍已經有啲裝飾華麗嘅花轎擺放住可以影相,同埋掛住啲燈籠,已經好有氣氛。同埋周邊有啲特式小商店為慶祝呢個節日,會係呢段時間有減價。

京都站大樓

行完河原町一帶,搭左巴士返酒店拎行李,同埋係酒店附近間大型超市LIFE,食埋午餐買埋上機嘅野食,就去京都站。

京都站內都有百貨商場,地下商店街,各種各樣的餐廳,手信店。而京都上有一條免費嘅空中走廊,京都市內嘅景色都可以睇到,對面就係京都塔,想睇夜景的話,可以找日夜晚上黎,就唔洗晒錢上去京都塔瞭望台啦。行完,差唔多時間要搭車去機場啦。

由京都直達到機場就搭一架叫HARUKA(はるか)嘅列車,我地由京都搭呢架返機場,係買一張叫JR West One Day Pass,而唔係買HARUKA嘅車票,價錢係2300日圓,用呢個Pass可以坐到HARUKA嘅自由席(不能坐指定席)買呢個會平過單買HARUKA指定席嘅價錢。而因為呢張係Pass,你唔一定去到京都站先買呢張(我都蠢咗),可以由你住的站(一定要係關西JR線)任何一站搭用呢張Pass到京都站,再用返呢張Pass坐HARUKA自由席就慳返啲啦!當然如果你想坐指定席嘅話,可以單買返HARUKA指定席車票啊。或用ICOCA&Haruka套票都可以,就睇返每人不用行程,程況而買適合自己嘅套票啊。

 

咁就結束咗呢次行程~

其實大阪關西絕對可以去兩次,我呢次行程都無去到大阪其他景點,例如:USJ,天王寺,梅田等,所以下次會買周遊卡,去埋大阪其它景點~

 

來源:はるこ

原文網址:https://travel.ulifestyle.com.hk/news/detail/23787/

發表迴響

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料